Itantandudo ita ti Philippine National Police (PNP), babaen ti panangidaulo ni PNP Chief General Nicolas Torre III ti panagusar ti ad-adu pay a body-worn cameras, drones, ken mobile closed-circuit television (CCTVs) para ti naparpatak nga oras ti panagresponde kadagiti emergencies.
Pinasingkedan ni Police Regional Office III Director ken PNP Spokesperson Police Brigadier General Jean Fajardo a ti agdama ket addaanen ti PNP kadagiti saan a bumaba ti 2,700 a body-worn cameras, 648 kadagitoy ket kabaelan iti live broadcasting bayat a dagiti nabatbati met ket maar-aramat para iti recording.
Kinunana nga apaman fully-operational ton iti 911 national emergency response number, tarigagay ti hepe nga amin a nakapatrolya a pulis ket agsuot ti body cams.
Daitoy ket kasaruno ti pammilin ni Torre iti kaunaan a Command Conference a nasken nga agbalin a moderno ti panagresponde dagiti kapulisan kadagiti emergency a pagkasapulan dagiti Pilipino, para metten iti kinatalged ken kinakapia ti komunidad.
Kabayatanna, plano pay ti PNP a mangusar kadagiti drones para kadagiti dadakkel a panagtitipon ti tattao; ti agdama ket addaanen ti aganay 965 a drones ti organisasyon.
Karaman pay ti modernized approach ti PNP ket dagiti CCTV cameras para ti 360° a panagbantay kadagiti lugar a masansan a papapanan iti publiko kasta met dagiti kangrunaan a kalsada ken eskenita ti pagilian.
