Pinasingkedan ti Philippine Embassy idiay Israel nga aktibo itan ti Crisis Management Team da tapno sungbatan ti pagkasapulan dagiti Pilipino nga apektado napartuat a gyera ti nagbaetan ti Iran ken Israel.
Indauloan pay daitoy mismo ni Ambassador Aileen Mendiola a panggep a tutokan dagiti panagrang-ay mainaig ti kumarkaro a tensyon dagiti dua a pagilian.
Maipalagip a nangisayangkat ti panagraut ti Iran sadiay Israel a dagos met a sinungbatan ti biang dagiti Hudyo babaen ti militar.
Gapo iti daitoy ket dimmakkel pay iti pakaseknan ti kinatalged ken seguridad dagiti Pilipino nga agnanaed ken mangmangged iti nasao a lugar.
Impasiguro met ni Ambassador Mendiola a saan da a putden iti koordinasyon kadagiti awtoridad sadiay Israel kasta met ditoy Pilipinas para madagdagos a tulong.
Maallukoy met dagiti Pilipino nga umannurot iti polisiya ti Israeli Defense Forces Home Front Command ken tumutok kadagiti abiso ti Embahada.
