Ikonkonsidera ti gobierno ti Pilipinas ti posibilidad nga ipangato ti alert level idiay Israel ken Iran gapo iti agtultuloy nga opensiba ti dua a pagilian.
Segun kenni Foreign Affairs Undersecretary Eduardo de Vega, nupay naka-Alert Level 2 laeng ti Israel ken Level 1 met idiay Iran, agtigtignay met iti Pilipinas a kas Alert Level 3 ti sitwasyon wenno adda itan ti boluntaryo a panagpaawid kadagiti Pilipino.
Kinuna ni De Vega nga agtultuloy da a banbantayan ti kasaad dagiti Pilipino kadagiti apektado a lugar tapno masiguro ti kinatalged da sakbay a mangiruar ti pinal a desisyon.
Idi laeng kallabes ket nangisayangkat ti air strike ti pagilian nga Israel kadagiti napapateg a paset ti Iran kas preemptive strike tapno lappedan ti pannakapartuat da ti nuclear weapon, ngem bimmales met nga insigida ti Iran babaen ti panagpatayab kadagiti ginasut a missiles ken drones.
Segun pay iti Department of Foreign Affairs (DFA), manamnama a mai-evacuate dagiti 26 a Pilipino manipud Israel nga agturong idiay Jordan inton umay a ngudo ti lawas bayat a dumanon met ti 150 ti nangipeksa ti panagayat da para ti repatriation. Agingga 17 a Pilipino metten ti nag-evacuate idiay Iran.
Kabayatanna, suspendido latta ita amin a flight operations kadagiti apektado a lugar idiay Middle East.
