BR LA UNION – Agruprupsan iti bangkay ti 69-anyos a lola kalpasan a masarakan daytoy iti karayan idiay Barangay Guinabang, Bacnotan idi aldaw ti huwebes Hunyo 19, dua aldaw sipud naipadamag a mapukpukaw.
Nabigbig ti biktima a ni Anita Querol Pascua, balo, residente ti nasao a lugar.
Iti pannakiuman ti Bombo Radyo kenni Police Major Lawrence Ganuelas, pannakangiwat iti La Union Police Provincial Office, indetalyena nga idi Hunyo 17 nagpakada ti biktima iti pagtrab-trabahuan na a refilling station tapno mapan iyapon ti taraken na a baka iti tengnga ti napigsa a buyat ti tudo.
Sipud dayta, saan metten a napasangpet ti pamilya na iti biktima, banag tapno agreport-da kadagiti otoridad.
Kalpasan ti dua nga aldaw, idi bimmaban ti danum iti nasao karayan, maysa a barangay tanod a managan Erwin Adriano iti nakakita iti biktima a nakaselsel kadagiti poon ti kawayan asideg idiay Maragayap River.
Dagus nga in-report ti kagawad ti nakita na iti Bacnotan Police Station.
Kalpasanna, binigbig ken kinumpirma iti maseknan a pamilya a ti nasarakan a bangkay ket isuti mapukpukaw a miyembro ti pamilyada.
