Nagsapata a mangipadanon iti tulong ti Department of Interior and Local Government (DILG) para kadagiti Pilipino nga adda sadiay Israel nangruna ita a kumarkaro pay ti gyera da kontra Iran.
Daitoy ti waragawag ni DILG Secretary Jonvic Remulla kalpasan a sinangaili na dagiti 17 nga opisyales a natalged a nakasubli ditoy pagilian manipud ti dinar-ayan da a study tour idiay Israel.
Kagiddan iti daitoy ket impasigurado manen ni Remulla a nakasagana ti ahensya da, kabinnulig ti Department of Foreign Affairs (DFA) ken uray ti Office of the President (OP) tapno agresponde kadagiti maip-ipit a kailian kabayatan ti kumarkaro a tensyon.
Nakasagana metten dagiti departamento a mangipaay ti rescue airplane apaman makapanpanunoten dagiti Pilipino para iti repatriation.
Iti agdama ket agingga 30K ti bilang dagiti Pilipino idiay Israel ken 191 paylaeng kadagitoy ti naipasidong ti repatriation. Sumagmamano a rason iti panagtalinaed dagiti adu a Pilipino manipud ti nagpada a pagilian ket nagbalinen a nasinged ti rikna kadagiti amo da wenno awan ti agur-uray a trabaho kenkuada ditoy Pilipinas.
