Nagpakdaar ti Department of Health (DOH) iti publiko kontra kadagiti online scams a mangen-endorso kadagiti peke nga agas para iti hypertension.
Segun iti ahensya ket awan iti pammaneknek a makaagas iti sakit dagitoy ken pulos met a saan a mangideklara ti DOH iti komersyal a produkto.
Inwaragawag da pay a peke dagiti websites wenno pages agsipud ta tultuladen da laeng iti DOH ken kadagiti personnel da tapno makalako.
Gapo iti daitoy ket nagpalagip iti Health Department nga agannad iti manangallilaw a marketing strategy a mangar-aramat kadagiti peke nga endorsement manipud kadagiti eksperto.
Naireklamo metten ti DOH iti Department of Information and Communications Technology (DICT) dagiti peke nga accounts ken mangar-aramid dan kadagiti addang tapno mapagsungbat nu siasinoman ti adda iti likudan daitoy.
