BR LA UNION – Nakapanawen dagiti 26 a Pilipino idiay Israel babaen ti voluntary repatriation program ti Philippine Embassy, maibasar iti waragawag ti embahada ita nga aldaw ti Domingo.
Dagitoy ket binayabay ni Philippine Ambassador Aileen Mendiola ken DMW-OWWA team idiay Allenby Border Crossing tapno masiguro ti natalged a panagballasiw da agturong idiay Jordan.
Inasikaso met ti embahada iti transportasyon, transit visas, travel documents, ken plane tickets dagiti nasao a Pilipino.
Sakbay da a pimmanaw idiay Israel, nagnaed nga immuna dagitoy iti shelter ti Department of Migrant Workers (DMW) ken naipaayan da pay ti relief packages, libre a legal assistance, ken orientation para iti reintegration benefits da nga agsubli ditoy Pilipinas.
Immuna nga impadamag ti Department of Foreign Affairs (DFA), a ti grupo ket buklen ti 26 overseas Filipino workers (OFWs) ken maysa a turista.
Kabayatanna, maipros-proseso metten ti maikadwa a batch ti repatriation a pakaibilangan dagiti 33 a Pilipino.
Maipalagip a naipatungpal ti repatriation iti tengnga ti kumarkaru a tensyon iti baetan ti Israel ken Iran.
Nangrugi ti sinnukat ti panagbomba idi Hunyo 13 kalpasan nga akusaran ti Israel iti Iran, a dandanin agaramid ti nuclear weapon, banag a pinaglibakan ti Tehran.
