Binitay ti Iran ti maysa a lalaki a napaneknekan nga espiya ti Israel.
Segun iti korte ti Iran, binitay da ni Mohammad-Amin Mahdavi Shayesteh idi kalman, aldaw ti Lunes, Hunyo 23 gapo iti intelligence cooperation na iti Zionist regime – awag iti Iran idiay Israel.
Napasingkedan ti kaadda ti koneksiyon ni Shayesteh iti Foreign intelligence agency ti Israel a maawagan kas Mossad.
Nasentensyaan pay isuna iti koordinasyon iti Iran International, maysa a Persian-language TV channel a nakabase idiay London, a kritikal iti gobierno ti Iran.
Maikonkonsidera ti nasao a channel a direkta nga adda koneksyon na idiay Israel nga ibilbilang met dagiti otoridad ti Iran a terorista nga organisasyon.
Kabayatanna, idi laeng Dominggo ket inwaragawag pay ti hudikatura ti panagbitay kenni Majid Mosayebi gapo iti panagbalin na a secret agent ti Mossad.
Imbatad ni judiciary chief Gholamhossein Mohseni Ejei a dagos da a pagsungbaten ti siasinoman a mapaneknekan da a mangsupsuporta iti Israel ken kumadkadwa iti kalaban.
Maibasar kadagiti human groups, ti pagilian nga Iran ti maikadwa iti listaan ti “Most prolific executioner” ti intero a lubong, sumarsaruno laeng iti numero uno ti listaan a China.
