Impasiguro ti Philippine National Police (PNP) nga addan iti case build up ti kaso dagiti nasurok sangagasot a “missing sabungeros” babaen ti Internal Affairs Service (IAS).
Iti press conference idiay Kampo Krame, impasiguro ni PNP Chief Police General Nicolas Torre III a kabinnulig da ti National Police Commission (NAPOLCOM) babaen kenni Commissioner, Vice Chairperson ken Executive Officer Atty. Rafael Vicente Calinisan iti panagrang-ay ti kaso para kadagiti disiplinary actions nga ipaulog da. Innayon pay ni Torre a suroten da pay ti proseso ti Department of Justice (DOJ).
Suportado pay ti hepe dagiti addang ti NAPOLCOM kasaruno ti imbutaktak ni alias ‘Totoy’ a saan a bumaba ti 20 a pulis ti karaman iti kidnapping case dagiti mammallot.
Iti agdama ket agtultuloy latta ti NAPOLCOM, kakadwa dagiti dadduma pay nga ahensya para ti motu propio investigation ken nagpakdaar da nga awan ti mapaboran a pulis ken maikkat a dinagos iti serbisyo ti siasinoman a mapaneknekan a karaman iti kaso.
