BR LA UNION – Sumangsango iti dismissal wenno pannakaikkat iti serbisyo dagiti pito a pulis ti Manila Police District (MPD) gaputi extortion wenno panagkikil iti maysa a 49 anyos a lalaki.
Iti statement, pinasingkedan ni National Capital Region Police Office (NCRPO) chief Maj. Gen. Anthony Aberin ti pannakaaresto dagiti nairaman a pulis, maysa kadagitoy ket teniente, 3 nga staff sergeant ken 3 a patrolman, amin ket nakadestino iti Anti-Drug Unit ti Police Station 5.
Natiliw dagitoy iti uneg ti istasyon idiay Ermita, Manila idi rabii ti Lunes.
Nagramot ti operasyon iti pannakatiliw ti complainant idi Hunyo 20 gapu iti mapapati a parbo a drug cases, a bayat ti kaadda daytoy iti kustodiya dagiti pulis, maipagarop a kinikilan dagiti mairam-raman a pulis ti P50,000 a gatad ti asawa ti lalaki, kasukat ti pannakawayawayana.
Nupay P20,000 laeng ti naited, nawayawayaan ti complainant nga awan ti kaso na. Idi naammuan dagiti police officers a nangipila iti reklamo ti lalaki, insublida ti kuarta tapno maibabawi ti reklamo maibusor kadakuada.
Nakumpiskar kadagiti nagkikil a police officers iti 7 a mobile phones a mapapati a naaramat iti extortion, 5 nga official police IDs, screenshot ti digital transactions ken saritaan ken remittance records ti kinikil da a kuarta.
Dagiti naaresto a pulis ket naipasidong iti restrictive custody bayat a maur-uray ti pannakaipila ti kaso a robbery-extortion, grave threats, arbitrary detention ken panaglabsing iti Anti-Graft and Corrupt Practices Act ken Presidential Decree 1829 mainaig iti obstruction of justice.
Imbilin pay ti hepe ti NCRPO ti imbestigasyon ken pannakaikkat ti commander ti Police Station 5 gapu iti saanna a panagtignay iti nadakamat a kaso.
