BR LA UNION – Kinondena ti Trade Union Congress of the Philippines (TUCP) iti petisyon a naidatag idiay Pasig City Regional Trial Court a mangkidkiddaw nga ipasardeng ti panangipatungpal ti Wage Order ti National Capital Region–Regional Tripartite Wages and Productivity Board (NCR-RTWPB).
Segun iti TUCP, nairanta ti petisyon nga indatag ti dua a construction firm a lapdan ti panangipatungpal ti P85 a nayon iti inaldaw a minimum wage dagiti mangmangged idiay Metro Manila, kabilang ti umuna nga umento a P60 a naipatungpal idi Hulyo 25.
Impaganetget ti labor group a ti nasao nga addang ket mangitantan iti nabayagen nga ur-urayen nga umento ti suweldo dagiti mangmangged laksid nga agtultuloy ti panagngato ti presyo ti taraon, pamasahe, kuryente, pabalay, ken dadduma pay a kangrunaan a kasapolan.
Inawagan ti TUCP iti petisyon a nalawag a kina-agum ken awan panangisakit ti sumagmamano a kumpanya iti kasasaad dagiti mangmangged a Pilipino.
