BR LA UNION – Immadu pay ti bilang dagiti indibidwal a nangidatag ti reklamo iti Presidential Anti-Organized Crime Commission (PAOCC) kontra iti online lending application.
Segun kenni PAOCC executive director Gilbert Cruz, iti uneg laeng ti dua a lawas ket umaboten iti 13,000 a tattao ti nangidatag ti reklamo manipud iti sigud a 150, dua a lawas ti napalabas.
Gapu iti umad-adu a bilang dagiti reklamo, nangipasdek ti one-stop shop iti PAOCC, kadwa da iti mangibagbagi ti Securities and Exchange Commission (SEC) ken Philippine National Police (PNP).
Ti nasao nga opisina iti mangtutok wenno mangasikaso kadagiti nasao a reklamo tapno naparpartak iti panagresponde dagitoy.
Maysa nga inaramid nga ehemplo ni Cruz a kangrunaan a naawat da a reklamo ket dagiti indibidwal nga immutang ngem saan a dagus a nakabayad, a dagitoy iti agbalbalin a biktima ti personal a panagatake, malisyoso nga online post, ken blackmail manipud iti loan apps.
Ditoy Pilipinas, adda iti aganay 300 online lending apps, agraman dagiti naka-rehistro iti SEC.
Naaramid pay ti PAOCC ken dadduma pay a law enforcement agencies nga iparikep iti agingga 50 lending apps, kasaruno dagiti serye ti inspeksiyon.
Segun kenni Cruz, adda pay dagiti gangannaet nga adda iti ikod dagiti nasao a lending apps, a mangbutbuteng ken mangbikbiktima kadagiti Pilipino.
