Nagpabigbigen ti maysa kadagiti akusado ti pannakapukaw ti mapapati a nasurok sangagasot a mammallot nga isu iti nangibinglay kadagiti impormasyon para iti panagdur-as ti kaso.
Napateg dagiti nagbalin a rebelasyon ni alias ‘Totoy’ wenno Julie “Dondon” Patidongan iti agpayso a nagan, nga itan ket maibilbilang kas state witness kadagiti mapupukaw a mammallot.
Maipalagip nga imbutaktak ni Patidongan a karaman ti aganay 20 nga aktibo a pulis ti pannakapukaw dagiti biktima nga isu’t rason tapno mangiyuswat ti moto proprio investigation ti National Police Commission (NAPOLCOM), babaen ti panangidaulo ni NAPOLCOM Commissioner Vice Chairperson and Executive Officer Atty. Rafael Vicente Calinisan.
Segun kenni Internal Affairs Service Inspector General Atty. Brigido Dulay, gapo kadagiti impormasyon ni Patidongan ket maaddaanen ti case build up ti hanay da, isu a kiniddaw na iti akusado a mangipila ti pormal a sinapataan a waragawag a mausar para ti imbestigasyon.
Iti agdama ket agur-urayen ti IAS kadagiti testimonya ni Patidongan ken impasiguro a suroten da ti aniaman nga addang wenno direksyon a turongen ti NAPOLCOM para iti patas ken natalged a pannakatratar iti kaso.
Kabayatanna, maipalagip a manipud 2021 agingga 2023, pito a pulis ti naikkat ti serbisyo a naibutaktak nga adda pakainaigan da kadagiti mapukpukaw a mammallot.
