BR LA UNION – Natay iti dua a lallaki a nakalugan ti motorsiklo kalpasan a naidungpar da iti kasinnabat a wing van truck idiay Balaoan, La Union.
Napasamak ti aksidente iti kawatiwatan ti national highway idiay Barangay Masupe, Balaoan agarop ala 1:50 ti parbangon idi kalman, Hulyo 3, 2025.
Dagiti biktima ket nabigbig nga isuda: John MIkko Natura, agtawen ti 28, maysa a Technical Support Staff, nagmaneho ti motorsiklo ken addaan ti professional driver’s license ken iti backride a managan Earl Gian Obra, 21-anyos, estudyante, ken agpada a residente ti Barangay Camiling ti nasao nga ili.
Nabigbig met ti truck driver a ni Antonio Tambong, agtawen ti 41, residente ti Barangay Northville, Blk 69, L12 Bangkal, Malolos City, Bulacan.
Maibasar iti inisyal nga imbestigasyon dagiti otoridad, iti wing van truck ket agturong iti amianan a direksiyon idinto nga agpa-abagatan met ti motorsiklo.
Maibasar iti report, kinuna ti truck driver nga immagaw ti linya iti nasabat na a motorsiklo, partikular iti pasikko a paset ti kalsada, a rason ti pannakaidungpar dagitoy.
Gapu iti kapigsa ti impact ti aksidente, naipurwak dagiti nagkalubbon ti motorsiklo ken nagsagaba dagitoy ti nakaru a pannakadun-dunor iti naduma-duma a paset ti bagi bayat a ti motorsiklo ket arigna a nawara ken naipurwak pay ti sumagmamano a partes daytoy.
Naiturong dagiti biktima idiay Balaoan District Hospital idiay Balaoan, La Union ngem indeklara a dead-on-arrival ti attending physician a ni Dr. Elaine Ruth de Guzman.
Awan met ti sinagrap a dunor iti truck driver.
Kabayatanna, maipagarop a saan a nakasuot ti protective helmet dagiti biktima. Nakailanad pay iti report, nga agtudtudo ken nagalis iti kalsada idi napasamak ti aksidente.
Posible a human error wenno reckless driving ti makagapo iti napasamak nga aksidente.
