Pinasingkedan ti Malacañang nga agtaltalinaed a silulukat ni Presidente Ferdinand Marcos Jr. kadagiti kiddaw ti amin a sektor mainaig ti kanayunan a sueldo dagiti mangmangged.
Karaman kadagiti dengnggen na ket dagiti empleyado, negosyante, ken agpupuonan tapno makabukel ti desisyon a pagsyaatan ti tunggal dasig.
Segun kenni Palace Press Officer Claire Castro, agtultuloy iti tarigagay ti administrasyon ken panangipatungpal kadagiti programa a nairanta tapno sumayaat ti kasasaad dagiti mangmangged a Pilipino.
Mailasin ditoyen ket dagiti job fairs a nakapagpataud ti aganay 170K a trabaho manipud 2022 agingga Mayo 1, 2025.
Innayon pay ni Castro a dumanon ti agingga 350K a trabaho ti napataud ti intero a pagilian manipud 2022 agingga 2024 nga inggubuay ti US$27-B a panagpuonan a simrek ditoy Pilipinas.
Maipalagip nga idi laeng kallabes ket nangipatungpal ti Regional Tripartite Wages and Productivity Board ti kanayunan a P50 daily wage para laeng kadagiti mangmangged idiay Metro Manila.
