Dumanonen ti 24 a tattao ti bilang dagiti pimmusay gapo iti nasaknap a panaglayus idiay Texas, USA. Nangibati pay daitoy kadagiti adu a mapukpukaw nga ubbing a babaen manipud iti Christian summer camp.
Gapo iti daitoy ket madama iti panangisayangkat ti sapasap a search and rescue operation iti nasao a Estado.
Karaman kadagiti mapukpukaw ket ti aganay 25 nga ubbing manipud kadagiti 750 nga ubbing a babbai a dimmar-ay ti Camp Mystic iti ruar laeng ti Kyrrville town iti makin-Amianan-a-laud ti San Antonio, ciudad ti Texas.
Kabayatanna, naipangato metten ti pakdaar kasaruno ti panagngato ti lebel ti danum manipud Guadalupe River, nu sadino ket dimmanon ti 26 a kadapan nga awan pay iti maysa nga oras kasta met iti panaglayus a nangiyanod kadagiti mobile homes, luglugan, ken holiday cabins a nangibusbosan dagiti nababaknang iti lugar ti selebrasyon da iti 4th of July kas panagrambak ti Independence Day ti Estados Unidos.
Naideklara payen ti State of Calamity kadagiti dadduma a counties, pakairamanan ti Hill County ken Concho Valley regions a sumagmamano a kakalsadaan ti saan a madalanan gapo kadagiti nagtutumba a linya ti komunikasyon.
Inawagan ni US President Donald Trump ti trahediya a “shocking” ken “terrible” kasaruno ti panagkeddeng ti panangipaay ti kanayunan a tulong kadagiti nakaro a naapektaran.
Agingga ita ket agtultuloy ti panagbirok kadagiti mapukpukaw babaen kadagiti helicopters, drones, ken bangka agingga mamaysa-maysa ti nagan dagiti amin a biktima.
