Ad-adalen pay ti Armed Forces of the Philippines (AFP) ken US Army nu maaramat para inton sumaruno a Salaknib Exercises ti kontrobersyal a Typhon Missile System.
Kinuna ni Philippine Army spokesperson Colonel Louie Dema Ala a napagsaritaanen dagiti opisyales ti dua a pagilian ti maipanggep iti konsepto, karaman ti panagusar kadagiti dadduma pay a weapon systems.
Iti panagleppas ti Salaknib Exercises ket nadakamat ti Philippine Army dagiti sektor ken military capability a kasapulan pay a mapasayaat.
Mabalin nga irekomendar dagiti military official ti panagusar ti Typhon System tapno punuan dagiti makitkita a pagkurangan kadagiti serye ti joint army training kadagiti napalpalabas a tawen.
Malaksid iti Typhon system, kinuna ti opisyal a mabalin pay a mausar dagiti dadduma a rocket wenno missile systems, depende iti resulta ti panagadal ken evaluation dagiti military officials ti pagilian.
Kabayatanna, inton 2026 iteration ti Salaknib Exercises ket posiblen a maiyakar idiay Visayas ti venue. Segun kenni Dema Ala, panggep ti PA a mausar amin a strategic area ti Pilipinas babaen kadagiti nakatuding a military simulation.
Gapo iti dayta ket manamnama met nga inton sumaganad a tawen ket agturong met ti puersa ti Estados Unidos ken ti Pilipinas idiay Mindanao, a maitunos ti Archipelagic Defense Concept ti pagilian.