Adda ita ti kustodiya ti City Social Welfare and Development Office dagiti dua nga estudyante ti Grade 9 idiay Basilan National High School kalpasan a naalan iti video ti panagbugbog ken gandat a panagbagsol da iti pada da nga estudyante.
Segun kenni Police Regional Office 9 Police Major Shellamie Chang, puerpuersaen dagiti dua ti biktima nga agaramid iti saan na a kayat, kas iti panagsigarilyo.
“Pinipilit siyang manigarilyo or something, basta may pinapagawa sa kaniya na ayaw niyang gawin”
Sumangsango ita dagiti nasao nga estudyante iti panaglabsing ti Anti-Bullying Act kasaruno ti pormal a panangipila ti reklamo idi Hulyo 4.
Nupay kasta, mataming da met a kas maiyannurot iti Juvenile Justice and Welfare Act gapo iti panagbalin da a menor de edad, a maikonsidera paylaeng a Children in Conflict with the Law wenno CIL.
Kabayatanna, kinuna met ti Philippine National Police (PNP) a dagiti dua ket addaan iti napalpalabas a behavioral issues ken saan pay a nagsubsubli kadagiti pagtaengan da kalpasan ti insidente. Imbatad ni PNP chief Police General Nicolas Torre III a ti kinatalged dagiti estudyante ket agtaltalinaed kadagiti prayoridad ti hanay ken saan da a pulos nga ilaksid ti aniaman a klase ti panagabuso, nangruna kadagiti pagadalan – lugar a dapat ket nataldeg ti tunggal estudyante.
Iti biang met ti principal ti Basilan National High School a ni Arnel Hajan, mabalin a pinagkakatawaan da laeng ti insidente. Innayon na a ti biktima ket nakapadas ti pannakaulaw ken panagsarwa, nga immuna da nga inturong iti lokal nga ospital para iti inisyal a pannakataming sakbay a naiyakar iti pasilidad idiay Zamboanga City.
Nakapasidong itan ti heightened police visibility iti uneg ken ruar ti campus kasta met a naka-activate aminen a CCTVs iti lugar.
