Impaganetget ti Presidente ti Brazil a rumbeng nga agtignay iti intero a lubong tapno lappedan iti inladawan na kas “genocide” ti Israel idiay Gaza.
Daytoy a waragawag ket kagiddan ti panagtitipon dagiti lider manipud kadagiti 11 a pagilian kas paset ti BRICS idiay Rio de Janeiro idi kalman.
Impanawagan ni President Luiz Inacio Lula da Silva iti sango dagiti lider manipud China, India, ken dadduma pay a pagilian a saan da a mabalin nga saan a bibiangan ti araramiden a genocide ti Israel idiay Gaza.
Iti agdama ket awan iti ilaklaksid ti Israel kadagiti isaysayangkat da a strikes, agraman dagiti inosente a sibilyan ken ti pasadya a bisinen dagiti tattao kas taktika iti gyera.
Ti komento ti Brazil ket kabayatan ti panaglukat manen ti ceasefire deal idiay Doha, Qatar ti nagbaetan ti Israel ken Hamas, iti kangitingitan ti lumawlawa a panawagan a gibusenen ti 22 a bulan a gyera a nanagrugi iti panagraut ti Hamas idi Oktubre 7, 2023.
Innayon ni Lula nga awan ti aniaman a nainkalintegan a rason para ti terorista nga aksyon ti Hamas diyay nga aldaw — a nagresulta ti pannakatay ti aganay 1,219 a tattao nga kaadwan ket sibilyan nga Israelita. Nupay kasta ket nainget na met a kinondenar dagiti simmaruno nga addang ken panangibales ti Israel.
Karaman iti panagtataripnong ti BRICS ket ti Iran nga ibilbilang kas mortal a kabusor ti Israel kasta met iti Russia a nasinged iti pagilian da.
