BR LA UNION – Natay iti tallo nga agtutubo kalpasan a nalmes iti karayan a sakop ti Brgy. Garcia, Tubao, La Union idi Domingo, Hulyo 13, 2025 agarop alas 4:25 ti malem.
Dagiti tallo a biktima ket agtawen ti 16, maysa a grade 10 student, residente ti nasao a lugar; maysa a 19-anyos, college student, residente ti Villasis Pangasinan, ken maysa a barito a saan metten a nailanad iti report nu manu ti tawen na.
Napasamak ti pannakalmes idiay Aringay-Ifugao river a masarakan iti nasao a lugar.
Maibasar iti inisyal nga imbestigasyon, dagiti tallo ket nagturong iti karayan tapno agdigos.
Ngem bayat ti panagdidigos dagiti biktima ket kelllat a naiyanod dagitoy iti nauneg a parte ti karayan nga isu’t rason ti pannakalmes da.
Kabayatanna, sakbay a nagresponde dagiti otoridad, maysa a concerned citizen ti nangisayangkat ti cardiopulmonary resuscitation (CPR) kadagiti biktima ngem napaay a maisubli ti anges dagitoy.
Naideklara a natayen dagiti tallo nga agtutubo babaen kenni Dr. Janice Allegria.
