Nakaawiden ditoy Pilipinas dagiti walo a seafarers ti MV Eternity C a rinaut dagiti Houthi rebels sadiay Red Sea.
Indaulwan ni Department of Migrant Workers (DMW) Secretary Hans Leo Cacdac iti panangsabat kadagiti seafarers sadiay Ninoy Aquino International Airport Terminal 1 idi rabii, Hulyo 16, 2025.
Sakbay iti panagawid da ket naipaayan dan ti inisyal a tulong manipud iti Philippine Consulate General idiay Jeddah, Saudi Arabia.
Amin dagitoy ket maipaayan ti financial assistance babaen ti Aksyon Fund ti DMW, Emergency Repatriation Fund manipud iti Overseas Workers Welfare Administration (OWWA) ken iti Department of Social Welfare and Development (DSWD) Office.
Malaksid iti pinansyal a tulong ket makaawat da pay ti comprehensive reintegration support manipud iti Technical Education Skills and Development Authority (TESDA) .
Maipalagip a rinaut dagiti Houthi rebels iti Greek-owned bulk carrier nga MV Eternity C idi Hulyo 7 ken 8 bayat iti kaaddada sadiay Red Sea.#
