Inlawlawag ti Department of Finance (DOF) a saan a baro a buis ti naipatungpal nu di ket panangipaulog laeng iti maymaysa a tax rate a 20% kadagiti amin nga interest income manipud iti deposito nu kasta ket maikkat ti saan a patas a sistema a pumabpabor laeng kadagiti babaknang nga addaan ti long-term deposits.
Daitoy ket kasaruno a makagun-od iti nasaknap a panangbabalaw manipud iti publiko iti probisyon ti Capital Market Efficiency Promotion Act (CMEPA), partikular iti panagbuis iti interes kadagiti bank deposits.
Kinuna ti ahensya a ti 20% tax iti interes ket agarairan idi pay tawen 1998, wenno sakbay pay a nagbalin a linteg ti CMEPA, a nagbalin nga epektibo idi laeng Hulyo 1, 2025. Innayon da a naikkat laeng dagiti sigud nga exemptions ken preferential rates kas iti 0% tax kadagiti depositors a nasurok ti lima a tawen, 5%–20% tax kadagiti short-term deposits, ken 15% tax para ti dollar deposits.
Kaspangarigan agdeposito ka iti P100K ti maysa a bangko nga addaan iti 2% annual interest, mabirukam iti P2K; ngem gapo iti maikissay a 20% tax iti dua ribo a pisos nga aganay P400 ket P1,600 lattan iti agbati iti interes mo.
Segun pay iti DOF, 99.6% ti pakabuklan a deposito ket siguden a mapapaulogan ti 20% a buis. panggep laeng ti CMEPA Law nga aramiden a patas ti laban para ti nagpada a long-term ken short-term depositors. Saan metlaeng daitoy a retroactive, dagiti daan a deposito sakbay pay iti linteg ket agtaltalinaed latta a masakopan ti sigud a tax benefits. Mailaksid pay ti 20% tax dagiti savings babaen ti SSS, GSIS, ken Pag-IBIG (kas iti MP2).
