BR LA UNION – Nainget a pinaglibakan ni Department of Public Works and Highways (DPWH) Secretary Manuel Bonoan iti agwar-waras nga alegasyon iti social media nga innem a mammanday linteg iti nakagun-od ti P800 bilyon a balor dagiti proyekto para iti flood control.
Iti panagsango ti sekretaryo iti panagdengngeg ti House Committee on Public Accounts, inawagan ni Bonoan iti nasao nga akusasyon kas “preposterous” wenno nakakat-katawa ken awan ti anyaman a basaran iti panangtalantan dagiti programa ti ahensya.
Dinakamat ni Senior Deputy Speaker David “Jay-jay” Suarez iti isyu, a nangdetermina iti maysa a viral Facebook post a mangibagbaga nga adda sumagmamano a kongresista a maipagarop a nangmaniobra ti pondo para iti bukod nga interes.
Gaputi dayta, direkta a sinalodsod ni Ako Bicol Rep. Alfredo Garbin Jr. ni Bonoan nu adda iti kasta nga alokasyon.
Sungbat ni Bonoan, awan iti specific a budget allocation para iti innem a mammanday linteg.
Segun met kenni Committee Chair ken Bicol Saro Party-list Rep. Terry Ridon, saan a naggapo iti lehitimo a media outlet iti alegasyon, nudiket naggapo laeng iti maysa a blog post iti Facebook.
Impaganetget ni Suarez a seryoso iti Kamara a sangwen iti isyu, nangruna ket paset daytoy ti pagrebbengan da a bantayan iti panaggastos iti imprastraktura kas sungbat iti panawagan ni President Marcos iti maika-uppat nga State of the Nation Address.
Imbaga ni Suarez, saan nga ipalubos ti kongreso a dadaelen ti biddut nga impormasyon iti talek ti publiko kadagiti institusyon.
