Inkeddeng ti Energy Regulatory Commission (ERC) a solbaren da iti kadarasan a panawen ti agarop 5K a pending cases da pakairamanan dagiti aplikasyon ti Power Supply Agreements (PSAs), Capital Expenditure (CAPEX), rate resets dagiti private distribution utilities, ken dadduma pay a rate-related issues.
Segun kenni ERC Chairperson Francis Saturnino Juan, maidutok ti tunggal commissioner kas oversight head nu kasta ket masigurado ti madagdagos nga aksyon iti tunggal kaso.
Impaganetget met ni Commissioner Floresinda Baldo Digal ti kinapataeg ti kaadda iti “reconciled case inventory” tapno marugianen ti epektibo a panangtaming kadagiti backlog.
Kinuna met ni Commissioner Paris Real a nasken a prayoridad dagiti nabayagen a kaso a nagtaud manipud iti sigud pay nga Energy Regulatory Board (ERB).
Kas paset iti panangpapartak iti proseso ket ipaspasardengen ti ERC ti panangiposte kadagiti Notices of Commission Action (NCAs) tapno maliklikan ti pannakatikaw nu ketdi ket mangiruar laengen ti opisyal a desisyon ti uneg ti dua a lawas kalpasan ti tunggal panagtataripnong.
