Agapaman a ngimmato dagiti makapkaptan ti sakit a dengue ditoy pagilian idi bulan ti Hulyo ti agdama a tawen.
Maibasar iti datos manipud Department of Health (DOH), naobserbaran ti panagngato ti kaso ti dengue ti aganay 15,091 manipud Hulyo 13 agingga Hulyo 26 – dua a lawas kalpasan ti panagduprak dagiti bagyo a Crising, Dante, ken Emong a sinabayan pay ti epekto ti Southwest Monsoon wenno Habagat.
Nangatngato daitoy a datos iti pito a porsyento kadagiti kaso a nailista idi Hunyo 29 agingga Hulyo 12 a dimmanon ti 14,131. Nakaalerto itan ti ahensiya ken agtaltalinaed metten nga aktibo dagiti dengue fast lanes kadagiti ospital.
Agtultuloy latta a maballaagan iti publiko kontra iti sakit babaen ti panagdalus iti aglawlaw ken panangitaktak kadagiti mabalin a pagitlogan dagiti lamok a mangiwarwaras ti dengue.
Kinuna ti ahensya nga apaman a makapadas ti panaggurigor ti lagpas dua nga aldaw kasta met dagiti rashes, panagsakit ti bagbagi ken mata, pannakaulaw, ken panagsarwa ket agpakonsulta a dagos iti health center wenno iti dengue fast lanes.
