Inwaragawag ti United Nations (UN) a nasurok 1.5M nga Afghans ti napilitan nga agsubli idiay Afghanistan ita a tawen kalpasan a patalawen ti Iran ken Pakistan kasaruno ti uppat a tawen pannakaipasdek ti gobierno-Taliban idiay Kabul.
Maibasar iti datos ti International Organization for Migration (IOM), aganay 700K kadagitoy ket manipud idiay Iran, a napatalaw gapo iti napainget a kampanya ti gobierno kontra kadagiti krimen a patauden dagiti Afghans, karaman ti panagespiya.
Iti biang met ti Pakistan, pinapartak da iti panangpatalaw kadagiti Afghan refugees kalpasan ti anunsiyo a saanen a mapawaywayan pay dagiti Proof of Registration cards da.
Segun iti United Nations High Commissioner for Refugees (UNHCR), adu kadagiti agaawid ket saan pay a nagsubsubli idiay Afghanistan ti uneg ti sumagmamanon a dekada ken dagiti dadduma met ket naiyanak iti sabali a pagilian.
Babaen iti liderato ti Taliban, mapadasan dagiti agsubli nga Afghans iti strikto a limitasyon iti karbengan pangtao da nangruna kadagiti babbai a maiparit pay iti panagadal ken nawaya a panaggaraw.
Segun pay iti UNHCR, bimmaba ti pondo para kadagiti agsusubli. Ti sigud a $2K ket nagbalin laengen a $156 — gatad nga umdas laeng para ti dua a lawas a pagkasapulan ti tunggal pamilya.
Nupay binigbig ti Russia iti Taliban kas opisyal a gobierno ti Afghanistan, kaadwan kadagiti pagilian ti saan paylaeng a mangbigbigbig iti liderato da.
Inwaragawag dagiti sumagmamano nga eksperto a ti puersahan a panangpaawid kadagiti Afghan refugees ket mabalin a nanglabsing iti prinsipyo ti non-refoulement wenno panangiparit a mangpasubli ti maysa a tao iti pagilian na nu ti biag na ket agpeggad.
