Manamnama a mabakwit kadagiti sumaganad a lawas ti manipud 30 agingga 50 a Palesino nga ubbing a nakaro dagiti saksakit da wenno nadundunor gapo iti gyera idiay Gaza. Maiturong dagitoy idiay United Kingdom (UK) para iti medikal nga atensyon.
Daitoy ti umuna a gundaway a mangitugot ti UK kadagiti ubbing a Palestino babaen ti maysa nga opisyal nga operasyon ti gobierno, kabinnulig ti Foreign Office, Home Office, ken Department of Health.
Ti panagpili kadagiti ubbing ket isayangkat ti World Health Organization (WHO) ken makadwa met dagiti nagannak nga umalalay para iti biometric screening.
Daitoy nga addang ket kasaruno ti panawagan dagiti 96 a miembro ti parliamento manipud nagduduma a partido a dagos a tulongan dagiti agkasapulan ti medikal nga atensyon iti kangitingitan ti arig na bagsak a sistema pangsalun-at iti Gaza.
Iti agdama ket awan pay iti sigurado a detalye nu anya iti pagilian a mausar kas transit point, nu mano iti eksakto a bilang dagiti mabakwit, wenno adda pay dagiti sumarsaruno a grupo nga agturong idiay UK.
Gapo ta pinnarigat iti agsubli idiay Gaza ket maiserrek paylaeng ti asylum system ti UK dagiti dadduma kadagiti nasao nga ubbing kalpasan ti panagagas.
Maibasar iti datos manipud UNICEF, nasurok 50K nga ubbing a Palestino iti pimmusay wenno nadundunor manipud nangrugi iti gyera idi Oktubre 2023. Nasurok 60K a tattao met ti naipadamag a natnatayen idiay Gaza segun iti Hamas-run health ministry.
