Nakakita ti Department of Energy (DOE) kadagiti lugar idiay Palawan para ti potensyal nga exploration ti native hydrogen, kasaruno ti naisayangkat a reconnaissance survey idi Agosto 12 agingga 15.
Ti surveying ket naisayangkat babaen ti koordinasyon ti Mines and Geosciences Bureau (MGB) MIMAROPA, Palawan Council for Sustainable Development (PCSD), ken dagiti lokal a gobierno ti probinsya.
Indauloan met ti nagbinnulig a technical teams manipud Energy Resource Development Bureau (ERDB) ken Energy Research and Testing Laboratory Services (ERTLS) ti panangala kadagiti samples ti danum, gas, ken bato manipud kagiti hot springs ken rock outcrops sadiay Sofronio Española, Narra, ken Puerto Princesa City.
Natakuatan kadagiti inisyal a resulta manipud idiay Kay’s Hot Spring idiay Barangay Santa Lourdes ken Bato-Bato Hot Spring idiay Barangay Calategas dagiti indikasyon ti natural hydrogen.
Dagiti naala a samples ket ipasidong met iti laboratory analysis ti DOE tapno mapasingkedan nu daitoy ket adda potensyal na para ti clean energy development a paset met iti inisyatiba ti ahensya para iti panangusar kadagiti indigenous clean energy sources ditoy pagilian.
Ti Palawan survey ket kasaruno dagiti immun-unan a panagadal idiay probinsya ti Zambales ken Pangasinan a naiyuswat babaen ti 2024 Philippine Bid Round. Panggep dagitoy a suportaran dagiti service contractors iti panagpili kadagiti umiso a lugar ket wagas para ti clean energy exploration.
Agserserbi met dagiti surveys kas panagsagana para ti kaunaan a specialized training ti native hydrogen exploration a maangay ita a tawen.
