Agtalek ti liderato ti Department of Finance a rumang-ay pay ti ekonomiya ti Pilipinas ita a tawen.
Segun kenni Finance Secretary Ralph Recto, target da a magun-od ti 5.4 agingga 6.5% a panagngato ti gross domestic product ti pagilian.
Idi napalabas a tawen ket nailista ti 5.6% gross domestic product growth a nababbaba iti target ti ahensya a 6 to 6.5 %. Inton masangwanan ket makitkita ti ahensya a ngumato pay ti 6% agingga 7% ti ekonomiya ti Pilipinas manipud tawen 2026 agingga 2028 a nababbaba ngem iti target a 6 to 8 percent.
Kinuna ni Recto a ti panagbaba ti target ket saan a kayat a satwen a panagbaba metten iti ambisyon nu di ket pammaneknek laeng iti nasirib a panangimaton ti piso ken talek iti plano ti panaggastar babaen ti smart spending.
Innayon na met nga agtaltalinaed a sibubukel ti talek ti gobierno iti panagrang-ay ti ekonomiya nga uray pay nangipatungpal ti Estados Unidos ti 19% a taripa kadagiti produkto a nagtaud ditoy Pilipinas.
