Nasentensyaan manen kas Guilty da Janet Lim-Napoles ken dagiti opisyales ti Technology Resource Center (TRC) babaen ti Sandiganbayan gapo iti panangiyakar da ti aganay P7.55M a Priority Development Assistance Fund (PDAF) ni sigud a Davao del Sur Representative Marc Douglas Cagas IV.
Karaman kadagiti sinentensyaan ti Special Third Division ti Sandiganbayan ket isuda Dennis Cunanan, sigud a deputy director general ti TRC; Maria Rosalinda Lacsamana sigud a TRC group manager; ken Rhodora Mendoza manipud ti National Agribusiness Corporation.
Babaen ti 149-a-pinanid a desisyon ket napaneknekan a guilty ti two-counts of graft and malversation of public funds da Cunanan ken Mendoza bayat a one count of graft and malversation met kenni Lacsamana.
Nasentensyaan a maibalud ni Napoles ti 12 agingga 20 a tawen gapo iti graft ken 20 agingga 34 a tawen para iti malversation bayat nga isuda Cunanan ken Lacsamana ket maibalud ti innem agingga sangapulo a tawen gapo iti graft ken sangapulo agingga 14 a tawen met para iti malversation.
Ni Mendoza met ket maibalud ti nagtipon nga innem agingga sangapulo a tawen ti graft ken 10-18 a tawen para iti malversation metlaeng.
Nagtaud ti kaso iti endorso ni Cagas ken panagpili ti People’s Organization for Progress and Development Foundation Incorporated wenno POPFDI kasta met ti Social Development Program for Farmers Foundation Incorporated wenno SDPFFI a puro non-government organizations a kontrolado ni Napoles kas project partners para iti distrito ti mamanday-linteg a makaipaay kuma kadagiti agricultural production packages iti masakupan na.
Nakaawat ti P2.7M iti POPDFI manipud iti PDAF ni Cagas bayat a P4.85-M met ti naiturong iti SDPFFI.
Pagbaybayaden pay ti korte ti aganay P2.7-M da Napoles, Cunanan, ken Lacsamana para ti malversation ken indemnity fee iti gobierno a kapada ti gatad ti interes iti POPFDI.
Para met iti SDPFFI, nabilin da Napoles ken Mendoza nga agbayad ti P4.85-M para iti indemnipikasyon ti kapada a gatad nga addaan pay ti interest rates.
Imbatad ti korte a maibasar ti General Appropriations Act kadagiti tawen a 2007 ken 2008 ket awan iti NGO a nanaganan kas implementing agency ti PDAF projects ket iti laeng ahensiya ti gobierno kas iti TRC ken Department of Agriculture ti otorisado ti panangimplimentar kadagitoy.
