Nainsulto ti maysa pay a kongresista manipud Mindanao iti nagbalin a waragawag ni Baguio City Mayor Benjamin “Benjie” Magalong seknan ti panangawag na a “moro-moro” iti imbestigasyon kadagiti maanomalya a flood control projects.
Segun kenni House Deputy Majority Leader ken Lanao del Sur Representative Zia Alonto Adiong, nasken a maraem ti Kamara kas maysa nga institusyon nga addaan mandato a mangimbestigar ken agbiruk kadagiti ebidensya.
Kinunana a ti panangawag kadagiti “sweeping labels” ket makadadael iti reputasyon dagiti amin a miembro ti Kongreso karamanen dagiti naimpusuan nga ar-aramiden iti trabaho da.
Nagtaud daitoy iti panangipeksa ni Mayor Magalong iti panagduadua seknan ti panangisayangkat ti Kongreso iti imbestigasyon mainaig kadagiti iregularidad dagiti flood control projects ken itantandudo ti kaadda ti third-party inquiry agsipud ta ak-akusaran na dagiti mamanday-linteg a nakaawat da kadagiti nagkakadakkel a kickbacks manipud kadagiti kontratista iti luglugar da.
Gapo iti dayta ket naimbitaran ni Magalong tapno sumango iti House tri-panel a naka-“under oath” dagiti testimonya na ken iruar dagiti iggem na nga ebidensya a mangpaneknek kadagiti inbagbaga na ti media.
Malaksid iti isyu ti proseso ket inyunay-unay pay ni Adiong a ti panagusar ti sao a “moro-moro” ket addaan ti nadagsen a pakasaritaan para kadakuada a Muslim agsipud ta nagtaud daitoy iti istorya idi panawen ti Espanyol nu sadino ket naglaban dagiti Kristyano ken Moro – maysa a pabuya wenno sarswela mainaig iti kolonyal a stereotyping ken diskriminasyon kadagiti Muslim.
Innayon na a nupay iti termino ket kadawyan a maus-sar para ti panangiladawan ti maysa a peke a pabuya, adu latta a Muslim ti ibilbilang daitoy kas insensitibo para iti pampubliko a diskurso.
Kinunana pay a ngumatngato ti talek iti publiko iti aniaman nga imbestigasyon nu dagiti mangak-akusar ket makailatag kadagiti dokumento ken nakasagana a sumango iti panagdengngeg agsipud ta ti mekanismo ti Kongreso ket tapno umawat kadagiti ebidensya, tumawag kadagiti testigo, ken makikoordinar kadagiti ahensya a mangipatpatungpal ti linteg.
Innayon na pay a ti panagraem ti institusyon ket saan a kayat a satwen a panangidulin kadagiti nagbasol nu di ket pannagipaay ti dalan kadagiti mangibagi ti komite nga aramiden ti pagrebbengan da ken panangipasigurado a masurot iti proseso babaen kadagiti nasapataan a testimonya ken panakibunnulig iti Ehekutibo nu adda iti matakuatan a pagsungbatan-kriminal.
