Kampante ti Philippine Army nga awan iti aggandat a manggulo iti mau-uray a parliamentary elections ti Bangsamoro Autonomous Region in Muslim Mindanao.
Kinuna ni Philippine Army spokesperson Colonel Louie Dema-ala nga awan sarday ti koordinasyon ti intelligence community para ti nagmaymaysa a security implementation a kiniddaw ti Commission on Elections, kabinnulig ti Philippine National Police daitoy nga eleksyon.
Innayon ni Dema-ala a maibasar iti bukod na a panagpalpaliiw iti rehiyon ket awan iti makitkita da a seryoso a pangta maipapan ti seguridad manipud iti mismo nga aldaw ti kampanya inton Agosto 28 agingga aldaw ti panagbobotos inton Oktubre 13.
Nupay kasta, adda met iti standing order a manipud iti national headquarters a mangpatalged ti kinakapia ti nawaya a panagbotos dagiti botante a mangpili iti kaunaan a BARMM parliamentary officials.
Maipalagip a maysa kadagiti inusar ni Presidente Ferdinand “Bongbong” Marcos Junior a rason ti panangitantan ti Barangay and Sangguniang Kabataan Elections ita a tawen ket tapno ipamaysa ti COMELEC ken iti puersa ti estado para ti overall security ti BARMM elections.
Napagammoan pay a ti sigud a kadakkelan a rebelde a grupo ti Moro ket karaman metlaeng iti eleksyon para inton Oktubre.
