Insayangkat ti Armed Forces of the Philippines (AFP) ti maysa a maritime cooperative activity (MCA) kadwa dagiti tropa ti Australian Defense Force ken Royal Canadian Navy (RCN) idi aldaw ti Sabado iti makin-Laud a paset ti El Nido, Palawan.
Paset paylaeng daitoy ti tinawen nga ALON Exercises a kadawyan ket makadkadwa ti Pilipinas dagiti tropa manipud nagduduma a kaalyado a pagilian.
Ita a tawen ket nausar dagiti naval assets a BRP Jose Rizal (FF150) iti biang ti Philippine Navy, HMAS Brisbane (DDG41) met para ti Royal Australian navy, bayat a sakay met ti HMCS de Quebec (FFH332) dagiti tropa ti Royal Canadian Navy.
Segun iti AFP, tampok iti panagsanay ket ti cross deck hosting ken vertical personnel transfer nu sadino ket nausar iti aktibidad ti MH-60 helicopter ti pagilian nga Australia tapno naballigi a maisayangkat ti training.
Kabayatanna, daitoy a maritime cooperative activity ket mangipakpakita laeng ti tarigagay dagiti nakipaset a pagilian para ti kaadda ti rules-based international order iti Indo-Pacific.
Naipamatmat pay iti natibker nga alyansa ti nagbaetan ti Pilipinas, Australia, ken Canada para ti panangitandudo ti freedom of navigation, regional stability, ken panangpapigsa ti maritime security.
