Imbutaktak ti maysa a concerned citizen iti Bombo Radyo ti kasasaad ti maysa a flood control project idiay Barangay Cugman, Cagayan De Oro City, Misamis Oriental nga itan ket nagbalinen nga abut-bot ken posible a mangigubuay ti peggad kadagiti residente.
Segun kenni Engineer Elmer Cotiamco, sigud a construction engineer idiay Northern Mindanao, delikadon iti sitwasyon nangruna ket adda iti likudan ti dike dagiti sangkabalayan. Saan laeng a maysa nu di ket tallo dagiti dadakkel nga abot ti istruktura, kas maibasar metten kadagiti ladawan nga impadanon ni Cotiamco.
Inbinglay ti inhinyero a naipadanon na metten iti pakaseknan na idiay opisina ni Congressman Rufus Rodriguez ken inaklon na a saan na nga ammo nga usaren ti website a Sumbong sa Pangulo.
Napagammoan a daitoy a proyekto ti Jejors Construction firm a nakabase idiay Camiguin a maawagan kas Cugman River Flood Mitigation Structure, Tablon Phase 7, nga addan ti kontrata a napermaan idi pay Enero 25, 2024 ken bidding amount a dumanon ti nasurok ₱8.9M.
Pinermaan daitoy ni Mayor Rolando Klarex Uy ken ni Jordan Tiu, authorized representative ti Jejors Construction Corporation kasta met a nanotaryohan babaen kenni ni Atty. James Judith.
Iti maysa pay a dokumento, ket nakailanad a naiyuswat ti bidding idi Hulyo 27, 2023 babaen ti City Engineering Office ken napondoan ti proyekto iti sidong ti 2023 Annual Budget babaent ti 20% Development Fund nga addaan ti aprobado a pondo a budget a ₱9M.
