Inawagan ni National Maritime Council (NMC) Spokersperson Undersecretary Alexander Lopez a paset laeng ti propaganda ti China ti panagpost ti social media a kukua ti pagilian da dagiti isla ti Batanes.
Kinuna ni Lopez a ti waragawag ti Beijing ket saanen a naiduma kadagiti naglabas nga inruar da kas iti panangibaga a paset ti pagilian da iti probinsya ti Palawan ken innayon a dagitoy ket puro misinformation, disinformation, ken nalawag a kinaulbod.
Segun iti Undersecretary, ammo ti intero a lubong a saan daitoy a mabalin a mapasamak agsipud ta dagiti ibagbaga da a kukua da ket paset amin ti teritoryo ti Pilipinas, ken umuna iti am-amin ket awan met iti pagilian a mamatmati kadagiti kastoy a waragawag ti China.
Imapaganetget na iti bileg ti arbitral ruling a nagkuna a kukua ti Pilipinas iti West Philippine Sea kasta met nga agtalek isuna a panggep laeng ti China a maaddaan manen iti baro a naratibo ken panangpadas a tikawen iti publiko.
