Nangipatayab manen kadagiti fighter jets ti North American Aerospace Defense Command (NORAD) tapno sarungkaran iti eroplano ti Russia a nasaripatpatan idiay Alaskan Air Defense Identification Zone (ADIZ) a segun kadagiti opisyales ket namintallon a napasamak iti uneg laeng ti maysa a lawas.
Segun iti report, maysa nga Il-20 airplane ti impatayab ti Russia a maus-usar para ti surveillance ken reconnaissance. Idi Agosto 20 ken 21 iti daitoy a tawen ket immunan a nangipatayab kadagiti F-16 jets ti Estados Unidos tapno pasingkedan ti kapada a modelo ti eroplano ti Russia nga agliklikmut iti Alaskan Air Defense Identification Zone.
Kas sungbat ket nangipatayab met ti NORAD ti E-3 Sentry command and control aircraft, dua nga F-16 fighter jets, ken dua nga KC-135 Stratotankers tapno sabaten ken sarungkaran dagiti nasao nga aircrafts.
Inlawlawag met ti NORAD nga agtaltalinaed ti eroplano ti Russia iti international airspace ken saan a simrek iti airspace ti Estados Unidos wenno Canada kasaruno ti panangipaganetget a ti Air Defense Identification Zone ket paset ti international airspace a kasapulan a madakamat dagiti lumablabas nga eroplano para iti national security.
