Insingasing ni Senador Migz Zubiri ti pannakabukel ti third party group nga agimbestigar para iti lifestyle check a maiyuswat kadagiti opisyales ti gobierno.
Para kenni Zubiri, nasaysayaat nu adda iti Anti-Corruption Body wenno maysa nga Authority a buklen ti Ombudsman, Commission on Audit (COA), ken ti Bureau of Internal Revenue (BIR) a mangisayangkat ti lifestyle check kas panagtungpal iti pammilin ni Presidente Ferdinand Marcos Junior.
Daitoy a mabukel a grupo ket nakapamaysa iti panagadal kadagiti Statements of Assets, Liabilities and Networth (SALN) dagiti opisyales ti gobierno tapno maamwan nu ti panagbiag da ket maiyannatop metlaeng kadagiti sueldo wenno biruk dagiti negosyo da.
Agtalek ni Zubiri a saan a maibagay a ti Kongreso ti mangidaulo iti panangimbestigar ti panagbiag dagiti kakadwa da a mamanday-linteg agsipud ta dagiti sumagmamano a karaman ti alegasyon ti korapsyon ket nagtaud kadakuada, partikular kadagiti “ghost projects.”
Kabayatanna, saan met nga agbalin a limitado kadakuada iti lifestyle checking nu di ket maaramid daitoy kadagiti amin a nadutokan ken nabotosan a kameng ti gobierno.
