BR LA UNION – Imbuking ni Senador Ping” Lacson iti maipagarop a saan a bumaba iti P51.82 bilyon a balor ti nalidem a “distinct” insertions iti 2026 National Expenditure Program (NEP), a kayatna nga ipa-realign kadagiti programa a maiyannurot iti Philippine Medium-Term Development Plan.
Segun kenni Lacson, nakalatang ti nasao a pondo para iti flood management program idiay Metro Manila ken Regions 1 (Ilocos), 2 (Cagayan Valley), ken 3 (Central Luzon).
Nagnumwan da kenni Senate Finance Committee Chairman Senador Sherwin Gatchalian nga ikkaten ti pondo para kadagiti proyekto a mapagdudua-an ken iyakar iti mas napat-pateg a programa.
Kagiddan daytoy, naki-koordinar da iti Department of Budget and Management (DBM) ken Department of Public Works and Highways (DPWH) tapno siguradwen a ti maaramid nga amendments ket maitunos iti direksyon ti gobyerno.
Iti briefing ti Development Budget Coordination Committee (DBCC), inlatag ni Lacson iti listaan dagiti proyekto a dinakamat na a mapagdudua-an, kabilang iti :
88 items a sag-P150 milyon ti balor na tunggal maysa wenno pakabuklan a P13.2 bilyon;
373 items a sag-P100 milyon tunggal maysa wenno pakabuklan a P37.3 bilyon; ken
11 items a sag-P120 milyon tunggal maysa wenno pakabuklan a P1.32 bilyon
Impaganetget ni Lacson, a maysa daytoy a klase ti “coded budget” a mangibagbaga nu sadino ti pakaituronganna dagiti proyekto.
Innayon na pay, adu kadagitoy ket awanan ti stationing wenno sigurado a lokasyon, nga indikasyon iti ghost project.
