LA UNION – Malem ti Setyembre singko idi aldaw ti Biernes ket inakomodar dagiti nagbinnulig a puersa ti Agoo Municipal Police Station ken dadduma pay nga operatiba, kadwa dagiti opisyales ti Barangay San Manuel Norte, Agoo, La Union a tulongan iti panag-surrender ken panaglosolos ti maysa a residente da manipud iti terorista nga organisasyon.
Kinadwaan da ti 75-anyos a balo a ni alias “Linda,” iti panagsurrender na iti gobierno tapno umikkaten iti grupo a Timek Ken Namnama Dagiti Babassit a Mangngalap ti La Union wenno TIMEK-Agoo La Union Chapter.
Segun kenni alias Linda, nadesisyonan nan nga ikkaten iti aniaman a suporta na iti organisasyon tapno agbiag a normal nga awanen iti pakainaigan na kadagiti grupo a konektado ti Communist Party of the Philippines – New People’s Army – National Democratic Front wenno CPP-NPA-NDF.
Naipasidong isuna iti custodial debriefing ken umiso a disposisyon kasta met a nagpirma iti Oath of Allegiance nga inmatangan dagiti operating units ken opisyales ti barangay.
