BR LA UNION – Pasado alas-10 itay agsapa, naisubli idiay Senado ni sigud a Bulacan assistant district engineer Brice Hernandez kalpasan ti panagdengngeg ita nga aldaw idiay Pasay Regional Trial Court Branch 112 seknan iti indatag na a Writ of Amparo petition.
Naipasidong ni Hernandez ti medical examination kalpasan a naisubli iti Senate detention facility.
Iti surat nga indatag dagiti abogado na kenni Senate President Vicente “Tito” Sotto III, kiniddaw da nga awaten ni Hernandez iti Senate Detention Facility.
Inwaragawag pay ti kampo ni Hernandez ti talek da, nga agpada nga agserbi nga ehemplo ti disiplina ken patas a panangtrato da Sotto ken Senate Blue Ribbon Committee Chairman Ping Lacson.
Kinuna da a ti panagtalinaed ni Hernandez ket pammaneknek a ti institusyon ket saan a lumislisi iti kinapudno ken saanna met a tallikudan iti tao a mangisug-sugal ti kinatalged na tapno ibutaktak dagiti nagbasol.
Manamnama a sumango ni Hernandez iti sumaruno a panagdengngeg ti Blue Ribbon Committee.
Pinatgan ni Sotto ti nasao a kadawatan ken bigbigen daytoy ti korte.
