Imbinglay ni Bise Presidente Sara Duterte a nakasaritana idi kallabes babaen ti telepono iti amana a ni sigud a Presidente Rodrigo Duterte nga adda a nakadetine iti International Criminal Court (ICC) idiay The Hague, Netherlands.
Paset kadagiti napagsaritaan da ket maipanggep ti pulitika, isyu ti flood control, ken iti love life daytoy.
Nupay kasta ket nagkedked isuna a mangipaay ti detalye maipanggep iti kapanunutan ti sigud a Presidente maipanggep ti flood control agsipudta saan isuna a napalubusan nga agistorya dagiti napagtungtungan manipud iti uneg ti pagbaludan.
Maur-uray met iti opinyon dagiti eksperto idiay ICC maipanggep iti kasasaad ti amana, kasaruno ti alegasyon ni Atty. Nicholas Kaufman nga addaan isuna ti “cognitive impairment” isuta rumbeng a maipasidong iti panagammiris.
Maipalagip nga intantan ti ICC iti confirmation of charges a nakaituding a panagdingeg inton Setyembre 23 kontra iti sigud a Presidente a makasangsango ti crimes against humanity gapo iti kontrobersyal a ‘war on drugs.’###
