Kinedkedan ti International Criminal Court (ICC) Trial Chamber III ti kiddaw ti kampo ni sigud a Presidente Rodrigo Duterte a manglimitar iti 10,000 items ti ebidensia a mabalin nga idatag ti prosekusion iti kasona a crimes against humanity of murder.
Daytoy a desision ket nairuar iti tengnga ti maikapat a status conference ti kaso a personal a tinabunuan ti sigud a presidente idiay The Hague.
Inlaksid met ti korte ti kiddaw ti depensa nga isubmitir manen ti prosekusion dagiti ebidensia iti baro a case file iti Judicial Workflow Platform (JWP), ti opisial a digital system nga us-usaren ti ICC a mangimaton kadagiti rekord.
Maibasar iti kaso nga impila dagiti piskal ti ICC, sumangsango ni Duterte iti tallo a kaso a crimes against humanity a mainaig iti mapapati a pammapatay ken attempted killings ditoy pagilian manipud Nobiembre 2011 agingga iti Marso 2019 babaen ti kampaniana kontra iti droga.
Kabayatanna, inwaragawag daytoy iti Bombo Radyo Roxas babaen ken ni Atty. Gilbert Andres, maysa nga accredited lawyer ti ICC, iti interview ti Bombo Radyo Roxas a dakkel ti implikasionda daytoy a desision kadagiti sumaruno a legal nga addang ken iti mismo a kurso ti masungad a pannakabista ti sigud a lider.
