Simarungkar ni Presidente Ferdinand Marcos Jr. ditoy probinsya ti La Union tapno idauluan iti panangibunong ti tulong kadagiti mannalon ken dagiti naapektaran a pamilya kadagiti naglabas a didigra.
Naisayangkat iti programa idiay Speaker Pro Tempore Francisco Ortega Convention Center ita nga aldaw, September 26, kadua ni Department of Agriculture (DA) Undersecretary Roger V. Navarro, DEPED Secretary Juan Edgardo M. Angara, Department of Social Welfare and Development (DSWD) Secretary Rexlon Gatchalian, ken dagiti provincial ken local officials.
Para iti inisyal a distribusyon dagiti Inorganic Fertilizers ken Fuel Assistance Card for Farmers ket immuna a naipaay kadagiti mannalon manipud iti ili ti Bacnotan, San Juan, ken San Fernando; cash assistance ken food pack manipud DSWD a naipaay kadagiti eligible 800 families; bayat a 1,574 a pamilya iti naipaayan ti tulong babaen ti Assistance to Individuals in Crisis Situation (AICS).
Maysa kadagiti programa iti Emergency Cash Transfer (ECT) payout manipud ti Department of Social Welfare and Development (DSWD) nga addan panggep a sungbatan iti pagkasapulan, mangsuporta ti panagrekobre, ken tulong iti renobasyon dagiti nadadael a pagtaengan.
Makaawat dagiti 800 a pamilya ti tig-P10,179 manipud ti ahensia ken kanayunan a family food packs.
Dagiti nabatbati nga eligible beneficiaries ket ma-schedule kadagiti sumarsaruno a lawas.
Naimatangan pay ti Presidente iti panakaipaay dagiti fuel assistance cards nga aggatad ti P3,000 tunggal maysa para kadagiti 275 a mannalon nga agtagikua wenno agab-abang ti makinarya pang-agrikultura para iti panagmula, livestock ken poultry production, ken naka-rehistro babaen ti Registry System for Basic Sector in Agriculture.
Buklen dagiti benepisyaryo a naipaayan ti fuel cards dagiti 88 a mannalon manipud Siyudad ti San Fernando, 62 manipud ili ti San Juan, ken 125 manipud Bacnotab.
Suportaran ti Fuel Assistance to Farmers Project dagiti mannalon nga agar-aramat ti farm machinery agsipud ta paset daytoy kadagiti kangrunaan nga operating expenses iti panagtalon. Panggep ti proyekto a pasayaaten iti resilience ken pababaan iti epekto ti ngumatngato a presyo ti petrolyo.
Malaksid iti Fuel Assistance, naipaay pay dagiti inorganic fertilizers kas subsidiya kadagiti mannalon tapno maipangato iti produksion ken food security ti pagilian, maipababa iti production cost, ken ilungalong iti panakaaramat ti organic ken inorganic fertilizers tapno imantinir iti salun-at ken produksion ti daga a mangpababa met iti panagdependir iti maymaysa a klase ti abono.
Naipaima met kadagiti municipal agriculturists iti pakabuklan a 1,861 fertilizer bags nga agdagsen ti 50 kilo tunggal maysa – 381 a sako ditoy San Fernando City, 882 idiay San Juan, ken 598 idiay Bacnotan.###
