Binabalaw ni Cardinal Pablo Virgilio David, presidente ti Catholic Bishops’ Conference of the Philippines (CBCP) ti kinaawan bibyang dagiti Pilipino iti kangitingitan ti mapadpadasan a rigat ti biag iti kaaduan, ken inawagan na daitoy kas ramot iti korapsyon.
Inusar ni Cardinal David iti homilya na ti kuento ni Lazarus manipud iti Bibliya tapno ipakita a saan a panagbisin wenno sakit iti pudno a pannakatay ni Lazaro nu di ket ti kaawan malasakit ti nabaknang a kaabay na.
Indasig ti kardinal iti sitwasyon ni Lazarus kadagiti Pilipino a mangmangged nga usto ngem saan latta nga umdas dagiti biruk da para iti disente a panagbiag.
Kinondenar na pay dagiti nagkakangina ken saan a sensitibo a panagbiag dagiti sumagmamano a nangangati ti saad na. Dinakamat na ti kaadda da kadagiti 40 luxurious cars, maysa laeng a pinnanganan nga agattad ti P700,000 para ti uppat a tao, ken ti singsing a regalo nga aggatad ti P50 million.
Nainget na pay nga inawagan dagiti politiko a mangus-usar ti kuwarta ti pagilian para ti kabukbukodan da nga interes kasta met dagiti ghost infrastructures, partikular dagiti flood control projects.
Gapo kadagiti mapaspasamak ket inpanawagan ni Cardinal David kadagiti umili a Pilipino nga agtignay kontra korapsyon!
Maipalagip nga idi Setyembre 21 ket simmurot isuna iti “Trillion Peso March” kontra korapsyon ken inallukoy na pay iti am-amin a sumali iti demonstrasyon.
