Posible a ti The Netherlands metlaeng ti agserbi kas “host country” wenno pagilian nga umawat kenni sigud a Presidente Rodrigo Roa Duterte apaman a palubosan ti International Criminal Court (ICC) ti interim release na.
Segun kenni Atty. Maria Kristina Conti, assistant to counsel idiay ICC, nakailanad kadagiti court records nga umuna a mairuar ni Duterte iti Dutch territory agsipud ta ditoy metlaeng a masarakan ti ICC.
Adda pay dagiti suwestyon a mabalin nga idiay metlaeng isuna The Netherlands maipasidong ti house arrest imbes nga umakar pay ti pagilian.
Impaganetget ni Conti a napatpateg ti panagsurot kadagiti kondisyon ngem nu anya a pagilian maiturong ti sigud a presidente, karaman ditan ti saan a panangaramid manen ti kabaroan a krimen, saan a panakibiang ti proseso, ken panagsubli iti korte kadagiti naituding a panawen.
Mabalin kunana a makaapektar iti ICC dagiti galad ti pamilya Duterte kas iti waragawag ni VP Sara Duterte a nangipeksa ti panagkontra na iti kina-lehitimo ti Korte.
Insingit na pay ti waragawag ni Bise Presidente seknan ti pannakapukaw ti puot ti ama na iti kwarto na. Innayon na a ti ICC ket addaan kadagiti nakasagana a doktors ken nurses tapno ipasigurado ti kinatalged dagiti amin a nakabalud kasta met a saan da a basta lattan nga ir-ruar dagiti medical records.
Impaganetget na a kayat latta met dagiti pamilya ti biktima ti war on drugs a nasiglat latta a sumango ti Presidente iti panagdengngeg tapno masungbatan dagiti damdamag da.
Maipalagip a kiniddaw manen ti kampo ni sigud a Presidente Duterte ti interim release na agsipud ta nabayagen a natantan ti proseso ti panagdengngeg ken addan dagiti problema iti salun-at na.
Nakaibalud latta iti sigud a Presidente sadiay The Hague, Netherlands kabayatan nga ur-urayen ti natantan a Confirmation of Charges kadagiti alegasyon kontra kenkuana.
