BR LA UNION – Nakastreken iti Philippine Area of Responsibility (PAR) iti low pressure area (LPA) nga imon-monitor ti PAGASA agarop alas 2:00 itay parbangon.
Naudi a nasaripatpatan ti PAGASA iti nasao nga LPA iti kaadayu a 1,080 km daya ti Southeastern Luzon.
Iti agdama, nangato ti tiyansa a mabukel a bagyo iti sumaganad a 24 nga oras ket nu ma-develop, mapanaganan ti bagyo paolo.
Maibasar iti projected track ti bagyo, dumalan iti nagnaan ti napalabas a tropical cyclone Nando ket posible nga agturong idia Babuyan ken Calayan group of islands wenno iti Northern Luzon.
Gaputi dayta, namnamaen a mangigubway ti baro a cyclone ti panagtudtudo iti Northern Luzon inton Biyernes, Oktubre 3, 2025.
Posible nga aglandfall idiay Cagayan area ken dumanon iti tropical storm category sakbay nga agdisso iti kadagaan.
Kabayatanna, Easterlies iti kangrunaan a mangapektar ti pagilian ita nga aldaw ti Miyerkoles.
