Impasiguro ni House Speaker Faustino Bojie Dy III a makanamnama iti publiko nga agtalinaed a silulukat iti budget process ti Kamara. Impunto na a tunggal sentimo a pakaipapanan ti pondo ket agturong iti pudno a pagkasapulan dagiti Pilipino.
Nagyaman met iti House Speaker kadagiti miembro ti Kamara, dagiti empleyado, ken kadagiti ahensya ti gobierno kalpasan iti naballigi a pannakaisayangkat ti sponsorship ken plenary debates para ti gakat a pondo a P6.3-T para ti 2026 national budget.
Kinunana a sumagmamano nga aldaw da a nag-overtime ken dimmanon pay ti agingga alas-tres ti bigat dagiti sesyon ti Kamara, ngem inan-anusan da daitoy tapno laeng matingiting a nalaing ken agbalin a silulukat ti deliberasyon ti pondo.
Dinayaw pay ni Dy ni Appropriations Committee Chair Representative Mikaela Suansing iti inisyatiba na nga aramiden a transparent ti proseso kas iti panag live-stream kadagiti budget hearings.
Maudi a nadakamat iti budget debate idiay plenaryo ti maipapan ti Lump sum ti Department of Budget and Management a dimmanon ti agingga innem nga oras.
Napalaos ti panagyaman ni Appropriations panel chair Mikaela Suansing ti suporta dagiti pada na a mamanday-linteg ken kadagiti nagduduma nga ahensiya a dimmar-ay ken simmungbat kadagiti damag tapno depensaan iti tinawen a pondo ti pagilian.
