BR LA UNION – Nabagsol ti maysa a 24-anyos a baro kalpasan a naduktalan ti 57-anyos a suspek a nagka-idda da ti misis na.
Napasamak ti pammagsol idiay Brgy. Tammocalao, Bacnotan La Union agarop alas 3:00 ti parbangon, Oktubre 7, 2025 ken residente iti nasao a lugar dagiti karaman ti insidente.
Maibasar iti inisyal nga imbestigasyon ti Bacnotan Police Station, agarop alas 1:00 ti parbangon, iti suspek ket maipagarop nga umin-inom ti nasanger iti mismo a balay na, bayat a ti misis na ken ti biktima, a kaanakan ti suspek, ket maipagarop nga umin-inom met iti ruar.
Maibasar iti report, binallaagan ti suspek dagiti dua nga agsardengen nga uminom.
Kalpasan ti sumagmamano a kanito a panaginana ti suspek iti uneg ti balay na, nadiskubre na a pimmanaw iti misis na ken biktima, ngem idi simmirip iti tawa ti kuwarto ti biktima ket maipagarop a nakita na a lamo-lamo ken agka-iddan dagitoy.
Gaputi napalaos a pungtot, nangala ti suspek ti kutsilyo kasaruno iti panang-konprontar na dagiti dua.
Naaddaan ti komosyon agingga a maipagarop a nabagsol ti suspek iti biktima.
Uray ti suspek ket nagsagaba ti pannakadunor gaputi napasamak a komosyon.
Agpada iti suspek ken biktima a naiturong iti Ilocos Training and Regional Medical Center ditoy siyudad ti San Fernando para iti pannakataming dagitoy.
Kabayatanna, narekobre dagiti nagresponde nga otoridad iti crime scene ti maysa a kutsilyo a mapatta-patta nga agatiddog ti 14 inches, a mapapati nga inusar ti suspek iti krimen.
Agtultuloy iti isay-sayangkat nga imbestigasyon ti Bacnotan Police tapno amwen ti pudno a motibo ti krimen ken nu maipursige ti kaso kontra iti suspek, laksid nga agkabagyan da iti biktima.
