BR LA UNION – Inpakaammo ti Bureau of Immigration (BI) nga iti agdama ket kit-kitaen da nu siasino kadagiti 33 a personalidad a naikabil iti sidong ti Immigration Lookout Bulletin Order (ILBO) ti nakaruar ditoy pagilian.
Segun kenni Immigration spokesperson Dana Sandoval, manamnama a maammuan ita nga aldaw ti listaan dagiti indibidual nga awan dtoy Pilipinas.
Maim-imbestigaran dagiti nadakamat a personalidad mainaig iti mapapati nga anomalya iti flood control projects nga aggatad iti bilyon a pisos.
Karaman kadagiti nagan iti lookout bulletin ti sumagmamano a mammanday-linteg, sigud nga opisyal ti gobiyerno, ken agdama nga agserserbi iti publiko.
Panggep ti Immigration Lookout Bulletin Order a bantayan ti garaw dagiti mairam-raman bayat a maisaysayangkat ti naun-uneg nga imbestigasyon.
Ti nasao nga order ket maysa a mekanismo ti Department of Justice (DOJ) a maipatulod iti Bureau of Immigration tapno mapakdaaran dagiti opisial ti imigrasyon kadagiti indibidual a sumangsango iti imbestigasyon wenno kaso.
Saan a kapada daytoy ti hold departure order, ngem agserbi latta a pakdaar tapno mamonitor ti panagruar iti pagilian dagiti mairam-raman .
Ti imbestigasyon ket idauluan ti Independent Commission for Infrastructure (ICI), a mangsuk-sukimat kadagiti flood control projects a maipagarop nga overpriced, ghost projects, wenno saan a maitunos iti aktual nga implementasyon.
Dadduma kadagiti proyekto ket napundoan ti dakkel a gatad ti kuwarta ngem awan ti umdas nga ebidensiya ti aktual a konstruksyon.
