Iti kangitingitan dagiti nagsasaruno a didigra kas iti ginggined, bagyo, panaglayos, ken pangreggay ti daga ditoy Pilipinas ket nagpakdaar ti Philippine Psychiatric Association iti posibilidad ti pannakapasar dagiti biktima ti “disaster fatigue.”
Segun kenni Doctor Joan Mae Perez-Rifareal, presidente ti Philippine Psychiatric Association, ti “disaster fatigue” ket maysa a klase ti emosyonal ken mental a pannakabannog ti tao a masansan ket nagtaud iti kaawan ti kontrol kadagiti mapaspasamak iti aglawlaw na.
Imballaag ti eksperto nga ipamaysa dagiti banag a kabaelan a makontrol kas iti panagsagana kadagiti panawen ti didigra, panagtungpal kadagiti abiso dagiti otoridad, ken panangtaripato iti bukod a salun-at.
Innayon pay ti doctor a napateg pay iti panagtitinnulong ti komunidad ken panangisakit iti tunggal maysa tapno mapagtalined ti kinatibker iti tunggal dumteng a krisis.
